خەبات فەدایی، هونەرمەندی کوردی خەڵکی گوندی “بۆڕیەر” سەر بە شاری سەوڵاوا و دانیشتووی شاری تاران، لەلایەن لقی ١ی دادگای ئینقلابی شاری وەرامینەوە بە سەرۆکایەتیی دادوەر “ئەشکان ڕامش”، بە ٦ ساڵ زیندانی مەحکووم کرا.
ئەو هونەرمەندە کوردە بە تۆمەتی “پڕوپاگەندە دژی نیزام” بە ساڵێک زیندانی تەعزیری و بە تۆمەتی “ئەندامبوون لە گرووپ و دەستەکان بە مەبەستی تێکدانی ئەمنییەتی وڵات” بە ٥ ساڵ زیندانی تەعزیری مەحکووم کراوە. دادگا بە پشتبەستن بە ماددەکانی ١٣٤ و ٢١٥ی یاسای سزای ئیسلامی، پەسەندکراوی ساڵی ١٣٩٢ و ماددەکانی ٤٩٨ و ٤٩٩ و ٥٠٠ یاسای تەعزیرات پەسەندکراوی ساڵی ١٣٧٥، ئەو حوکمەی بە سەر ئەو هونەرمەندە کوردەدا سەپاندووە.
جێگەی ئاماژەیە بڕیاری دادگا دژی خەبات فەدایی لە ڕێکەوتی ٣٠ی ڕێبەندانی ساڵی ١٤٠١، بە ئامادەبوونی خۆی دەرکراوە و بۆ ماوەی ٢٠ ڕۆژ دوای پێڕاگەیاندنی شیاوی پێداچوونەوە لە دادگاکانی پێداچوونەوەی پارێزگای تارانە.
شایانی باسە ئەو هونەرمەندە لە ماوەی دەسبەسەربوونیدا لە دەسپێڕاگەیشتن بە پارێزەر و چاوپێکەوتن لەگەڵ بنەماڵەکەی بێبەری کرابوو.
