شەپۆڵی دوهەمی ژەهراویکردنی قوتابخانەی کچان لەلایەن رژیمی ئیسلامی ئیرانەوە لە دوای نەورۆزەوە دەستی پێکردوەتەوە، ئەمڕۆ ٢٠ی خاکەلێوە لانیکەم ٦ قوتابخانەی کچانی شاری سەقز دەروازەی راپەرین ژەهراوی کران. دەبیرستانی تالەقانی، مئعراج، سومەیە و … ئەو قوتابخانانە بون کە هاوکات کەوتنە بەر هێرشی کیمیایی و ژمارەیەکی زۆر لە قوتابیانی ئەو قوتابخانانە ژەهراوی بون کە دواتر گوازراونەتەوە بۆ نەخۆشخانە و هەر بەو هۆیەوە بنەماڵەی کچانی قوتابی بە دژی رژیم هاتونەتە سەر شەقام و درۆشمی مەرگ و نەمان بۆ خامنەئیان وتەوە و ئالای رژیمیان لە سەر دەرگای قوتابخانەکانی شاری سەقز هێنایە خوارەوە و ئاگریاندا.
دوای ئەوەی رژیم قوتابخانەکانی ژەهراوی کرد، هە،وو شاری میلیتاریزە کردوە و تێکهەڵجون لەگەڵ خەڵک لە ناو بەردەم قوتابخانەی مئعراج و نەخۆشخانەی ئەو شارە روویدا و دوای ئەوە هێزە ئەمنیەتیەکان و یگان ویژە چەندین کەسیان دەستگیر کردوە و چەند کەسیش بریندار کراون و رێگاکانی چونی خەڵکیان بۆ گەرەکی شاناز کە ئەو قوتابخانە لەوێیە بەست، بۆ ئەوەی خەڵک بە هانای خۆپیشاندەرانەوە نەچن و تا ئامادە کردنی ئەم هەوالە دۆخی ناوشاری سەقز ناجێگیرە و خەڵک شەقام و کۆلانیان چۆل نەکردوە.
