گەنجێکی کورد و پەیڕەوی ئایینی یارسان بە ناوی “ئازاد ڕەزایی” لە شاری کرماشان، لە لایەن هێزە ئەمنیەتیەکانی رژیمی ئیسلامی ئێران تەقەی لێ کرا و فیشەکێک بەر سەری کەوت و گیانی لە دەستدا.
ئازاد رەزایی تەمەنی ٢٥ ساڵە و دانیشتووی گەڕەکی دەرەدرێژ (شارەکی مەهدی)ـى شاری کرماشانە، کاتژمێر ١١ى شەوی دووشەممە بە تەقەی ڕاستەوخۆی هێزە ئەمنیەتیەکانی رژیم و لە نزیک گۆڕەپانی نیایش کوژراوە.
بە پێی ئەو هەواڵەی پێمان گەیشتوە هێزە ئەمنیەتیەکانی رژیم لە پشتەوە تەقەیان لە ئۆتۆمبێلەکەی (پژۆ ٤٠٥) کردووە و فیشەک بەر سەر کەوتوە گیانی ئازیزی لە دەست داوە.
شایانی باسە ئازاد و سێ هاوڕێی دیکەی تەنیا لە شاردا گەڕاون، کەچى هێزە تیرۆریستییەکانى رژیم بانگەشەی ئەوە دەکەن کە ئەوان گرنگییان بە بازگەکەیان نەداوە و بۆیە تەقەیان لێ کردوون. ئەم بانگەشەیە لە لایەن خێزان و هاوڕێکانی ئازاد ڕەت کراوەتەوە.
