لە حاڵێکدا ژەهراویکردنی قوتابیان لە ئێران رۆژ لەگەڵ رۆژ رووی لە زیاد بونە، نوێنەرێکی مەجلسی رژیم وتویەتی، هیچ ژەهراویکردنێک بونی نەبوە. لە شاری سەقز لە نێوان بنەماڵەی خوێندکارانی ژەهراویکراو هێزە ئەمنیەتیەکان شەڕ و ئالوزی هاتە ئاراوە و چەندین کەس دەستگیر کراون.
مێهرداد وەیس کەرەمی، ئەندامی کۆمسیونی راهێنانی مەجلسی رژیمی ئیسلامی ئێران لە وتووێژێکدا لەگەڵ “رویداد ٢٤” وتی؛ بە پێی ئامارە رەسمیەکان تا ئێستە ١٠٠ کەس لە پەیوەندی ژەهراویکردنی قوتابیان دەستگیر کراون. بە وتەی ئەو نوێنەرە، کۆمەڵێک لە دەستگیر کراوەکان “بە ئەنقەست” دەستیان کردوە بە ژەهراویکردنی قوتابیان و کۆمەڵێکی دیکەش کلاو چوەتە سەریان و چونەتە نێو گەمەی ئەو کەسانە.
ئەم ئەندامەی کۆمسیونی راهێنانی مەجلسی رژیم لە حاڵێکدا باسی لە دەستگیری کەسانێک سەبارەت بە ژەهراویکردنی قوتابیان کرد کە هەر لەو وتووێژەدا وتی؛ هیچ ژەهراویکردنێک لە کاردا نەبوە، کۆمەڵێک لە خوێندکاران بە هۆی بونی نەوتەوە حاڵیان تێک چوە، ئەمە ژەهراوی بون نییە، حاڵەتی سکچون و رشانەوە لە روانگەی زانستەوە ژەهراوی بون نییە.بە وتەی ئەو نوێنەری مەجلسە؛ هیچ قوتابیەک کێشەی جدی بۆ پێش نەهاتوە و هەر کە گەیشتونەتە هەوای ئازاد چاک بونەتەوە.
جێگەی ئاماژەیە بە پێی هەواڵەکان رۆژی ١٨ی خاکەلێوە قوتابیەکی ١٦ ساڵە بە ناوی کارۆ پیشاوەر خەڵکی “پشاوە’ سەر بە کامیاران و دانیشتوی شاری تاران دوای سێ حەوتوو کە لە نەخۆشخانە بەستری بوو لە نەخۆشخانەی میلاد گیانی لە دەستدا. بنەماڵەی ئەو قوتابییە دەڵێن کە کارۆ ٢٤ی ڕەشەمە لە قوتابخانە، شوێنی خوێندنی لە تاران بە هۆی ژەهراوی بون بە هۆی گاز بەستری کراوە و دواتر گوازراوەتەوە بۆ نەخۆشخانەی میلاد و هەر لەوێش گیانی ئازیزی لە دەست داوە. لاشەی کارۆ گوازرایەوە بۆ زێدەکەی و لەوێ نێژرا.
