چه‌مکی یه‌کسانی
ده‌سته‌واژه‌ی یه‌کسانی واتایه‌کی سه‌رنجڕاکێش و ئالۆزی هه‌یه. له هه‌ندێ حه‌وزه‌ی کۆمه‌ڵایه‌تییدا یه‌کسانبوون و یه‌کسانی زیاتر، زه‌روور و ره‌وایه، هاوکات له ته‌ک ئه‌وه‌دا حه‌وزه و به‌ستێنی دیکه‌یش هه‌ن که له ته‌ک یه‌کسانییدا ته‌با نین و نابن. له به‌ستێنی شڕۆڤه‌ی دیارده‌ی یه‌کسانییدا دوو ڕه‌وتی سه‌ره‌کی به‌دی ده‌کرێن؛ له لایه‌که‌وه پرسی دابه‌شکاری یه‌کسانی سه‌رمایه و سامانی کۆمه‌ڵگه ده‌بێته ده‌غده‌غه و له لایه‌کی دیکه‌شه‌وه پرسی ده‌رفه‌تی یه‌کسان بۆ هه‌ر تاکێک و هه‌ر شارۆمه‌ندێک ده‌وری سه‌ره‌کی ده‌گێڕێ؛ واوه‌تر بۆ ئه‌م به‌رنامه تیشک ده‌خرێته سه‌ر پێکهاته سیاسی و کۆمه‌ڵایه‌تییه‌کان و سه‌ر سه‌بکی لۆژیک و کاریان، تا بزانین چ ده‌رفه‌تگه‌لێک بۆ به ئاکام گه‌یشتنی توانایی و پۆته‌نسیالی هه‌ر شارۆمه‌ندێک ده‌ڕه‌خسێنن. له ئاکامدا هه‌ردوو جه‌مسه‌ر ده‌بێ ناوه‌رۆک و واتای یه‌کسانی به پۆڵێنی دادپه‌روه‌ری و ئازادیه‌وه گرێ بده‌ن. به واتایه‌کی دیکه، هه‌رکه‌س که له به‌ستێنی بیرۆکه‌ی یه‌کسانییدا هاوڕای مێتۆدی ئیدئالی نۆڕماتیڤیی (پێشنیازیی) بێت، ئه‌وه ده‌بێ له بنه‌ڕه‌تترین هه‌نگاودا ڕوانگه‌یه‌کی تایبه‌تیشی سه‌باره‌ت به ئازادی هه‌بێ، هه‌تا له هه‌نگاوی دواتردا به گوێره‌ی پێویست گرامه‌ری هزری یه‌کسانی بخوێنێته‌وه؛ ئه‌و کات له‌و ئاسته‌وه ده‌توانێ به به‌ڵگه و مه‌نتیقه‌وه جیاکاری نێوان یه‌کسانی به‌ستێن و حه‌وزه جیاوازه‌کان بکات؛ سه‌رئه‌نجام ده‌بێ واتای ده‌سته‌واژه‌ی یه‌کسانی پێگه‌ی ئازادی ڕه‌چاو بکات و ده‌رفه‌ت بۆ یه‌کسانی سیاسی بهێڵێته‌وه، چونکه ئه‌مه خۆی جه‌وهه‌ری نه‌زمی سیاسی و کۆمه‌ڵایه‌تی دیموکڕاسییه. ژماره سێی گۆڤاری «هێما» هه‌وڵ ده‌دات، له سووچی جۆراوجۆره‌وه بۆ ئه‌و لایه‌ن و ڕه‌وته جیاوازانه‌ی ده‌سته‌واژه‌ی یه‌کسانی بڕوانت.
